05 февраля 2010 г.
Янкас ялĕнче çуралса ÿснĕ Вениамин Пехил поэт январĕн 2-мĕшĕнче 55 çул тултаратчĕ. 80-мĕш çулсенче унăн сăввипе кĕвĕленĕ “Шăнкăрав курăкĕ” юрра пĕлмен-илтмен çын та пулман.
Шывпуçĕнчи шкулта В. Пехил поэта аса илсе поэзи каçĕ иртрĕ. Ăна ялти библиотека заведующийĕ З. В. Ильина ертсе пычĕ. Шкулта поэтăн йăмăкĕ Л. В. Егорова вĕрентекен ĕçлет. Вăл унăн ачалăхĕпе çамрăклăхĕ çинчен аса илсе каласа пачĕ. В. Пехил шкулта вĕреннĕ чухнех сăвăсем хайланă, малтанхи сăввисем “Ял пурнăçĕ” тата “Пионер сасси” хаçатсенче кун çути курнă. Чăваш патшалăх университетĕнчен вĕренсе тухнă, “Ял пурнăçĕ” хаçатра ĕçленĕ, “Ялав” журнал редакцинче тăрăшнă. В. Пехил сăввисем ăшă кăмăллă, çутă ĕмĕтлĕ, тунсăхлă. Л. А. Владимирова вĕренекен ертсе пынипе шкул ачисем (7—9 класра вĕренекенсем) поэтăн сăввисене илемлĕ вуларĕç. З. В. Ильина поэтăн “Шăнкăрав курăкĕ”, “Янкас йăмрисем” кĕнекисемпе паллаштарчĕ. Юлашкинчен “Шăнкăрав курăкĕ” юрра итлерĕç.