22 января 2010 г.
Çĕнĕ çулпа Раштав тата çветке эрни те хыçа юлчĕ. Урамра шартлама сивĕ хуçаланать.
Кăшарни уявĕнче Раççейре вакра шыва кĕресси йăлана кĕнĕ ĕнтĕ. Çынсем сăнанă тăрăх, кăшарнире шыва кĕни чир-чĕре хăвалать, çак çулталăка аван пурăнса ирттерме вăй-хал парать.
Алманч ялĕнче пурăнакансем кăрлачăн 18-мĕшĕнче, çĕрле, пĕве çине вак каснă çĕре пухăннă. Уява пĕтĕмпе 25 çын хутшăннă. Вĕсем сивĕрен хăрамасăрах юрланă, ташланă, тĕрлĕ вăйă вылянă. Çурçĕр иртсен кăмăл тăвакансем шыва кĕме пуçланă. Чи малтанах пăрлă шыва Алманч ял тăрăхĕн ертÿçи В. В. Долгов чăмса тухнă. Çапла вара пĕр-пĕрин хыççăн 10 çын сивĕ шывран хăраман. Вĕсен хушшинче пĕр хĕрарăм — Л. А. Яковлева — пулчĕ. Пуçтарăннисене вĕри чейпе хăналанă. Сивĕ шывра пулни çынсене савăнăç кÿнĕ, ÿт-пÿ çăмăллăхпа, çĕкленÿпе тулнă.