12 января 2010 г.
Çак йĕркесене эпĕ вĕсене чăннипех те тивĕçлĕ ятлă-сумлă çыннăмăр — Гурий Егорович Дубров (Кăмакал Куркки) пирки калатăп. Кăçалхи кăрлач уйăхĕнче 76 çул тултарать пулин те творчество лаççинче çанă тавăрсах ĕçлет ĕçтешĕмĕр.
Ку таранччен вăл сăвă- проза темипе мĕн пурĕ вун пĕр кĕнеке пичетлесе кăларнă. Çав шутра — “Пирĕн тăрăхри вăрман”, “Тăван кĕтес”, "”Вĕсем — Путене таврашĕ”, “Пирĕн йăх-несĕлсем”, “Туя туй пек тăвар-и?”, “Йăх-несĕл уявĕ”, “Çеруш таврашĕ” тата ыттисем те.
Анчахрах сăвăç “Кун-çул сыпăкĕсем” ярăмăн сăвăсен пуххине çырса пĕтерчĕ. Вĕсенчен хăшĕ-пĕринпе вулакансене паллаштарас терĕм.
Юрăç пулнипе те палăрать тус-юлташăмăр.
— “Ял пурнăçĕпе” яланах тачă çыхăнура эпĕ. Кунта материалсем çырнипе пĕрлех редакци çумĕнчи агитушкăна хутшăнатăп, сцена çинчен халăха юрă-ташăпа савăнтаратăп. Акă, пĕлтĕрхи ноябрь-декабрь уйăхĕсенче кăна редакцин юрă-ташă ăстисемпе ялсенче, ĕç коллективĕсенче пулса мĕн пурĕ 15 концерт панă, — тет Гурий Егорович. — Ватăлатпăр пулин те чун-чĕре çамрăк-ха манăн…
Г. Дубров — районти Н. Янкас ячĕллĕ преми лауреачĕ, Раççей Журналисчĕсен союзĕн членĕ.