12 января 2010 г.
Райцентрти иккĕмĕш шкулти каток çине каçсерен ачасем çеç мар, çитĕннисем те пуçтарăнаççĕ. Конькисем тăхăнса пушă вăхăта усăллă ирттереççĕ вĕсем.
Виççĕмĕш класра вĕренекенсемпе вĕсен ашшĕ-амăшĕсем каток çине хаваспах тухрĕç. Çĕнĕ çул уявне класра мар, пăр çинче паллă тума палăртнă вĕсем. Çанталăкĕ те вăл кун пурне те савăнтарчĕ. Каток варрине вырнаçтарнă илемлĕ чăрăш уяв сăнне татах пуянлатрĕ. Конькисем тăхăннă ачасемпе класс ертÿçи, ашшĕ-амăшĕсем çĕкленÿллĕ кăмăлпа ярăнчĕç пăр çинче.
Ачасем елка тавра юрăсем юрларĕç, ташăсем ташларĕç. Коньки çинчи Хĕл Мучипе Юр пике те пушă алăсемпе килмен. Хăйсемпе пĕрле вĕсем вăйă-кулă, юрă-ташă, тупмалли юмахсем илсе килнĕ. Савăнăçпа пĕрлех ачасем хăйсен тавра курăмне аталантарма пултарчĕç. Хĕл Мучи аллинчен тутаннă кучченеç вĕренекенсене татах та хаваслантарчĕ. Уçă сывлăшра тутлă кекспа, вĕри чейпе хăналанчĕç. Ярăнса ĕшеннĕ хыççăн вăл вырăнлах пулчĕ.
Уяв пурне те килĕшрĕ. Вăл ачасен асĕнче нумайлăха асра юлĕ.