17 декабря 2009 г.
Декабрĕн 15-мĕшĕнче “Автошвейпред” пĕрлешÿре районти "Ял пурнăçĕ" хаçатăн кунĕ иртрĕ. Редакци журналисчĕсем кунта вăй хуракансемпе тĕл пулнă. Кунта хальхи вăхăтра 38 çын ĕçлет.
Тĕрлĕ профессиллĕ вĕсем. Кашниех харпăр хăй вырăнĕнче ырă тĕслĕхпе палăрать.
Асăннă коллективра район хаçатне алтьернативлă майпа сарас ĕçе йĕркеленĕ. Вун виçĕ çын район хаçатне çырăнса илет. Акă, çитес çулхи пĕрремĕш çур çулшăн район хыпарçине пĕрлешÿ ертÿçи — Игорь Валерьевич Дмитриев — пĕрремĕш çырăнчĕ. Çав йышра ытти ĕçченсем — вун тăваттăн.
Тĕл пулура райхаçатăн тĕп редакторĕ И. Прокопьев тухса калаçрĕ. Хаçата çулленех çырăнса илекенсен пĕр ушкăнне юрă кĕнекисем парнелерĕ.
Епле-ха вăл юрă-ташăсăр. Редакци çумĕнчи агитушкăн хăйĕн чăваш юрри-ташшипе савăнтарчĕ. Ташша “Автошвейпред” ĕçченĕсем те хаваспах тухрĕç.