11 декабря 2009 г.
Ял урамĕпе илемлĕ пит-куçлă хĕрарăм утать. Аллинче тулли сумкка. Кашни урамах çаврăнса тухать вăл. Кашни киле кĕрет. Пурин валли те чун-чĕре ăшши, тарават калаçу тупăнать унăн. Кам-ши вăл?
Супарти тĕслĕх библиотека заведующийĕ Людмила Леонтьевна Федорова пулчĕ ку. Пушă вăхăт тупса ял çыннисене кĕнекесем вулаттарассишĕн çине тăрать.
— Римма кинемей, халь сире Василий Алентейĕн “Вĕлле хурчĕ — ылтăн хурт” кĕнекине парса хăваратăп. Елена Порфирьевна, сире Юрий Скворцовăн “Пурнăç хумĕ” кĕнекине вулаттарасшăн, тархасшăн, — çепĕç кулăпа калаçать çамрăк хĕрарăм. — Елизавета Романова Сергей Павловăн “Тан таппи” кĕнекине вулас шутлине пĕлтĕм.
Нимĕчкассинче кăна вунă çынна яхăн кĕнекене алăран ямасть. Ытларах çав йышра — ватăраххисем. Людмила Леонтьевна кĕнекесемпе ялти лавккана та, фельдшер пунктне те, сĕт-çу фермине те çитет. Вĕсенче те кĕнеке тусĕсем йышлă тăрăшуллă библиотекарĕн.
— Уйрăмах çÿлерех асăннă авторсемсĕр пуçне А. Кипеч, Г. Максимов, Н. Симунов тата ытти çыравçăсен кĕнекисене ытларах вулаççĕ, — терĕ Л. Федорова. — Çав шутра хамăр ентешĕн — ЧР халăх поэчĕн Юрий Сементерĕн те пур.