11 декабря 2009 г.
Эпĕ Трак гимназийĕнче 9 “а” класра пĕлÿ пухатăп. Пирĕн кунта — 29 ача. Класс ертÿçинче Ираида Георгиевна Шорникова вăй хурать. Пирĕн пурин те пĕр тĕллев — лайăхрах вĕренесси, çĕр-шыва юрăхлă çын пуласси.
Гимназире час-часах паллă та пултаруллă çынсемпе тĕл пулатпăр. Акă, анчахрах кунта Тюмень хулин Центральнăй район администрацийĕн çут çанталăка сыхлас тĕлĕшпе обществăлла майпа ĕçлекен президиумĕн председателĕн çумĕ М. В. Байкалова тата районти ачасен искусство шкулĕн директорĕ Н. Никоноров пулчĕç.
Мария Владимировна пирĕн классене Тюменьри чăвашсен пурнăçĕпе ĕçĕ-хĕлĕ çинчен çав тери интереслĕ каласа пачĕ. Николай Никоноров баянпа выляса чăваш юррисене шăрантарчĕ.
Тĕл пулура асра юлакан самантсем пирки те чарăнам. Хаклă хăна — М. Байкалова гимнази директорне Г. Юлмасована тата Н. Никонорова Раççейри творчество учителĕсен Ассоциаци Канашĕн Координаци председателĕ В. Б. Сорокин тата “Çутçанталăк — çын, культура” Программăн ертÿçи М. В. Байкалова алă пуснă Хисеп грамотисене пачĕ. Ентешсем Мускавăн хаклă парнисене çын ырлăхĕшĕн тата çĕр-планета чечеклентĕр тесе ырми-канми вăй хунишĕн тивĕçнĕ.