27 ноября 2009 г.
Ĕçсĕр пурăнаймастăп эпĕ. “Ахаль ан лар, хĕрĕм, хăть кĕрĕк арки йăвала”, — тетчĕ анне. Кĕрĕк аркине йăваламан-ха эпĕ, хамăн хаклă çыннăмăрпа юнашар ларса тĕрĕ тĕрлеме, алсиш-нуски çыхма хăнăхнă. Кĕнеке, хаçат-журнал алăран пăрахман.
Тен, çавăнпах та пуль, ачамăрсем те хама пăхнă. Виçĕ хĕр те виçĕ ывăл манăн. Шел, мăшăрăм — Валентин ултă çул каялла çĕре кĕчĕ. “Гигант” колхозра механизаторта ĕçлетчĕ. Тăрăшуллă çын пулнипе палăрнă вăл.
Пирĕн кил Лесная урамри — шучĕпе 12-мĕшĕ. Килте Андрей тата Миша ятлă ывăлăмсемпе тата Антонина хĕрĕмпе пурăнатăп. Пурте хаçат-журнал вулама яланах çывăх.
Эпир “Ял пурнăçĕ” хаçата юратса çырăнатпăр тата вулатпăр. Мĕн килĕшет-ха? Ытларах çемье, воспитани ыйтăвĕсем канăç памаççĕ. Халăх медицини ыйтăвĕсемпе çыхăннă усăллă канашсем те пурнăçра кирлĕ.
Ялсенчи тирпей-илем ыйтăвне те кун йĕркинчен кăларас марччĕ.
Ватăлатпăр çав тăван. Кăçалхи июнь уйăхĕнче 70 çул тултартăм. Апла пулин те район хаçачĕпех пурăнатăп тата ватăлатăп та.