27 ноября 2009 г.
Вăрманкас Алманчри Юлия Александровнапа Самуил Андреевич Андреевсем ăçтарах килте пурăннине пĕр çамрăк хĕрарăм кăтартрĕ мана. Хăй тĕп урампа — Майски ятлипе картлăмпа мăшăр витре çĕкленĕ те çăл патĕнчен таврăнать. Çепĕççĕн яра-яра пусать. Ара, çулĕ те пăрлак тата юрлă. Тăруках шуса ÿкме те пулать вĕт.
Тĕрленчĕк
— Самуил Андрейччă ăçтарах пурăнать? — сăмах хушрăм хĕрарăма. — Аякра-ши, çывăх-ши…
Вăл тăпах чарăнчĕ те: ”Ман хыççăн утăр. Эпĕ Самуилăн кинĕ пулатăп”, — тесе хучĕ.
Ялти Садовăй урамри 5-мĕш килте пурăнаççĕ-мĕн Андреевсем. Кирпĕч çурт. Ăна 1984 çулта хăпартса лартнă. Ку урам тĕп урамран сулахаялла пăрăнсан…
— Тем чĕре йăшкать-ха манăн. Выртсах кайрăм акă, — вырăн çинчен тăрса ларчĕ кил хуçи. — Мĕнле килме пĕлтĕр?
— Ноябрь уйăхĕнче ытлах урама тухса та çÿреймерĕ-ха, — хăй калассине пĕлтерчĕ С. Андреевăн мăшăрĕ — Ю. Андреева. — Чир-чĕр пĕрре çаклансан…
Кил-çуртра ашшĕпе амăшĕ иккĕмĕш ывăлĕпе — Володьăпа тата кинĕпе — Надьăпа. Вĕсен Алинăпа Кристина хĕрĕсем пур. Алина качча тухнă. Кристина Алманчри вăтам шкулта 5-мĕш класра вĕренет.
Володьăн мăшăрĕ Нимĕчкассинчи сĕт-çу ферминче пăрусем пăхать.
— Эпĕ колхозра комбайнпа ĕçленĕ. Вăтăр çула яхăн ялти утарта хурт-хăмăр пăхнă. Манăн — пилĕк ывăл. Сакăр мăнук куç тулли, — тет 72 çул çинче пыракан Самуил Андреев. — Район хаçачĕ çырăннă тетĕн-и? Акă, сĕтел çинчех выртать.
— Эпĕ Нимĕчкассинче çуралнă. Самуилпа пĕрлешнĕ. Хуняма та район хаçатне çав тери килĕштеретчĕ. Хам та ăна алăран пăрахмастăп, — савăнсах хыпарларĕ Ю. Андреева. — Çапла пулмалла та…
Чăнах та, çапла пулмалла…