27 ноября 2009 г.
Тĕрленчĕк
Нимĕчкассинчи Алексей Игнатьевич Игнатьев 1930 çулхи сентябрĕн 6-мĕшĕнче çуралнă. Пĕчĕкрех çан-çурăмлă, маттур арçын. Урисем çинче çирĕп тăрать-ха. Çавах та ватлăх ватлăхах ĕнтĕ… Тухса çÿреме вăй-халĕ çукраххи палăрать.
— Тем, вырăн çинеллех туртать шăм-шакăм. Куçсем те йăвашланчĕç. Хăлхасем те витĕрех мар тата… Мăшăр пуррипе чир-чĕртен хăрамастăп эпĕ, — терĕ Алексей Игнатьевич. — Мăшăрăм Раиса ятлă манăн.
Сăмах çине пÿрте çырă хĕрарăм кĕрсе тăчĕ. Кăмăллă çын пулни куç кĕретех.
— Ман пирки сăмах вакламастăр пуль? Юрĕ-юрĕ, лайăххипе калаçнăшăн ÿкĕнмĕп эпĕ, — ман ума пукан шуçтарса лартрĕ кил хуçи хĕрарăмĕ. — Вырнаçăр-ха, тархасшăн…
Раиса Никоноровна Миролюбова, теççĕ ăна. Вăл 1933 çулхи февралĕн 18-мĕшĕнче çуралнă. Нимĕчкассине 1956 çулта качча килнĕ. Çĕньял Упи хĕр-упраçĕ пулнă-мĕн. Тивĕçлĕ канăва тухичченех “Гигант” колхозра тĕрлĕрен ĕçсенче вăй хунă.
— Алексей Игнатьевич, туй шыльăкпа авлантăн-и? Е вăрласа килтĕн? — ыйтуллăн пăхрăм ватăна. — Аса ил-ха çамрăклăха…
— Каккуй туй-шыльăкпа… Урамранах çавăтса кĕтĕм, — хăй калассине уçрĕ вăл.
— Хамăр ялтан хĕр-упраçсемпе туй курма килнĕччĕ те… Пĕр-пĕрне килĕштернĕ, паллах, — калаçăва хутшăнчĕ мăшăрĕ. — Халиччен алă çĕклесе курман.
Мăшăр хальлĕхе район хаçатне çырăнса илеймен-ха. Çавах та ватлăх укçи-тенкине алла илсен: “çырăнма кăмăллă эпир”, терĕç.
Ачисемпе те паллаштарам. Гальăпа Славик Алманчра пÿрт-çурт çавăрнă. Зоя — Мускавра. Ултă мăнук хисеплĕ ватăсен.
— Эпĕ ялти фермăра скотникре ĕçленĕ. Арман авăртнă выльăхсем валли. Ферма ĕнисем валли лашапа шыв турттарнă. Манăн “Ĕç ветеранĕ” медаль те пур, — сывпуллашнă чух пĕлтерчĕ кил хуçи. — Ытти наградăсене те тивĕçнĕ.