16 октября 2009 г.
Çеçмерти Валерий Шумилов фермер çулĕ çине тăнăранпа чылай вăхăт иртрĕ. Çак тапхăрта хуçалăха тытса пырас ĕçре пуян опыт пухрĕ Валерий Николаевич.
Паян В. Шумилов хресчен-фермер хуçалăхĕ — районта ăнăçлă ĕçлесе пыракансенчен пĕри. Техники кивĕрех пулсан та, мĕн пур ĕçсене вăхăтра туса ирттерме çителĕклĕ. Тракторсемпе машина-механизмсен ĕмĕрне тăсас тесе вĕсене типтерлĕ пăхса тăраççĕ.
Ку хуçалăх кăçал тĕш тырă — 50, çĕр улми — 12, пахча çимĕç — 2, çав шутра купăста — 1, хĕрлĕ кăшманпа кишĕр 0,5-шер гектар акса-лартса çитĕнтернĕ. Тырри гектартан вăтамран — 23, çĕр улми 180 центнер тухăç парнеленĕ. “Иккĕмĕш çăкăра” клиентсем уйранах илсе кайса пĕтернĕ. Пахча çимĕçĕ те пĕчĕккĕн-пĕчĕккĕн вырнаçса пырать.
Çитес çулхи тухăçшăн тăрăшса кĕр тыррисем 25 гектар акса хăварнă, мĕн пур лаптăк çинче кĕрхи çĕртме сухи тунă.
Хресчен-фермер хуçалăхне аталантарас тĕлĕшпе ăнăçлă ĕçлесе пынăшăн кăçалхи Ака туйра Валерий Николаевича ЧР Ял хуçалăх министерствин Хисеп грамотипе чысларĕç (сăн ÿкерчĕкре çав саманта сăнланă та).