16 октября 2009 г.
Катăк шăлсем пулнăран хăш-пĕр çынсем савăннă чух та çăвар туллин кулма именсе тăраççĕ. Ученăйсем тĕпчесе пĕлнĕ тăрăх, шăпах çавăн пек туллин кулни сывлăхшăн чи усăлли (хăйма çинĕ пек теççĕ мар-и тата). Апат-çимĕçе тĕплĕн чăмласа çини вара апата ирĕлтерме пулăшать, вар-хырăм ĕçне лайăхлатать. Ăнлантăр пулĕ ĕнтĕ, шăлсем тĕрĕс-тĕкел пулни сывлăха упрама пулăшать.
Анчах та райбольницăра кивĕ аппаратсем пулни, сиплев кабинечĕ умĕнчи вăрăм черетсем шăл юсас текенсен кăмăлне пăсатчĕç. Кăçалтан вара район поликлиникинчи стоматологи служби самаях пуянланчĕ: 2 çĕнĕ установка туяннă, кабинетсенче юсав ĕçĕсем туса ирттернĕ, пломба валли çĕнĕ составсем туянсах тăраççĕ. Стоматологи енĕпе ĕçлекен кашни специалиста — терапевтпа хирурга тата ортопед-протезиста — уйрăм кабинетра ĕçлеме майсем туса панă.
Юпа уйăхĕнчен пуçласа хуларан тепĕр икĕ тухтăр килсе ĕçлеме пуçларĕç. Стоматолог терапевт-хирург Олег Юрьевич Тестов кашни кунах ĕçлет. Протез лартакан Валерий Васильевич Москвичев ытлари кунсемпе эрне кунсенче килсе çÿрет.
Шăлсене тĕрĕс-тĕкел усрасси хăвăрăнтан кăна килет. Стоматологи ĕçченĕсем ватти-вĕттисене те, çитĕннисене те яланах пулăшма хатĕр.