13 октября 2009 г.
Пăрăнтăкра çут çанталăк тусĕсем нумай. Те ялĕ вăрмантан инçех мар вырнаçнăран-ши, кунти çынсем, уйрăмах Зоя Торинапа Анатолий Осипов, Геннадий Герасимов, Владимир Максимов, Анатолий Тихонов тата ыттисем, çырма-çатра таврашне çулленех йывăç нумай лартса хăвараççĕ. Акă, иртнĕ кунсенче З. Торинапа А. Осипов тата Г. Герасимов çырма пуçĕнче чăрăшсемпе хырсем, хурăнсем, çĕмĕртсемпе пилешсем, улмуççисем, шĕшкĕсем лартса тухрĕç. Вĕсене выльăх-чĕрлĕх кĕрсе çĕмĕрес хăрушлăх çук — тавралла карта тытнă. Владимир Максимов, унччен вăл лесникре тăрăшнă, катăркассемпе тернсем лартса хăварчĕ.
— Кĕçех кунта чăн-чăн вăрман пулса кайĕ, кăмпасемпе улма-çырласем татма унта çÿреме пуçлатпăр, — теççĕ пăрăнтăксем.