22 сентября 2009 г.
Тулли мар яваплă “Красное Сормово” пĕрлешĕвĕн директорĕн С. П. Ивановăн кăмăлĕ çак кунсенче çĕкленÿллĕ те, çав хушăрах пусăрăнчăк та. Пĕррремĕшĕнчен — яманаксен уйĕсем пушанса пыраççĕ, тыр-пул — кĕлетре, вăрлăхлăх çĕр улми — путвалта, пысăках мар лаптăксенчи кишĕрпе хĕрлĕ кăшмана алла илмелли çеç юлать. “Иккĕмĕш çăкăра” пухса кĕртме ял çыннисем, бухгалтерипе ферма ĕçченĕсем те тухнă, вĕсене Трак чăваш-нимĕç гимназийĕн педагогĕсемпе вĕренекенĕсем те пулăшу кÿнĕ. Тухăç кăçалхи типĕ çулшăн япăх мар — кашни гектартан вăтамран 200-е яхăн центнер пуçтарса кĕртнĕ.
Святослав Петрович ĕç çине хутшăннă мĕн пур ял çыннипе пĕрлех гимназистсемпе унти вĕрентекенсене ăшшăн тав тăвать.
Унăн кăмăлĕ тата мĕншĕн пусăрăнчăк-ха тетĕр-и? Уй-хирте çитĕнтернĕ пуянлăхăн хакĕ пĕчĕкрен, çавăн пекех ăна вырнаçтарма чăрмавлăран. Çапах яманаксем чунĕпе вуçех те хуçăлмаççĕ, вĕсем малашлăха çирĕппĕн пăхаççĕ, çĕр-шывра ял хуçалăхĕ çине урăхларах пăхма пуçăнасса кĕтеççĕ тата шанаççĕ.