07 августа 2009 г.
Июлĕн 23-26-мĕшĕсенче Шупашкарти “Олимпийский” стадионта çăмăл атлетика енĕпе Раççей чемпионачĕ иртрĕ. Унта çĕр-шывăн 60 регионĕнчи 900 яхăн спортсмен спортăн 40 енĕпе тупăшрĕ. Чи пултаруллисем вара çĕр-шыв чемпионĕ ята çĕнсе илнипе пĕрлех август уйăхĕнче Германире иртекен тĕнче чемпионатне каймалли путевкăна тивĕçрĕç.
Раççей чемпионатĕнче чăвашсенчен Степан Киселев стайер — 10 пин тата 5 пин метрлă дистанцисене чупассипе, Марина Максимова сăнă ывăтассипе пăхăр медальсем çĕнсе илчĕç.
Тĕрлĕ шайри ăмăртусене хутшăнса палăрнисен тупăшăвне пăхма интереслĕ пулчĕ. Чемпионат вĕçĕнче вĕсенчен хăшĕ-пĕрисемпе, тĕслĕхрен, кăçал Литвари Каунас хулинче иртнĕ çамрăксен Европа чемпионатĕнче 800 метра чупса çĕнтернĕ, хальхинче арçынсем хушшинче 1500 метрлă дистанцире Раççей чемпионĕ ята тивĕçнĕ Иван Тухтачевпа (Иркутск, Раççей Хĕç-пăшаллă вăйĕсем) тата виçĕ хут сиксе хĕрарăмсем хушшинче кăçал тĕнчере чи лайăх кăтартупа (514 см) палăрнă Надежда Алехинапа (Мускав, “Динамо”) курса калаçма тÿр килчĕ. Малтанах 20 çулхи И. Тухтачевпа курнăçрăмăр.
— Иван, маттур та эсĕ, арçынсене çĕнтерме пултартăн. 3,43.43 минут санăн рекорд пулчĕ-и?
— Çук, 1500 метрта манăн чи лайăх кăтарту — 3,40.48 минут.
— Ку таранччен эсĕ Шупашкарта пулнă-и?
— Çук. Атте манăн ку енчен. Шупашкарта пирĕн тăван-пĕтенсем нумай тетчĕ.
— Вăл тĕп хуларан е пĕр-пĕр районтан?
— Кăна татса калама пултараймастăп.
— Эсĕ чăвашла пĕлетĕн-и?
— Çук.
— Аçăр чăвашла пĕлет-и?
— Пĕлместĕп.
— Çитес ăмăртусенче çĕнĕ ăнăçусем тума ырлăх-сывлăх пултăр сана, Иван! Киле çитсен аçу-аннÿне чăвашсенчен салам калăр.
— Тавтапуç ырă сăмахсемшĕн. Çитсенех атте-аннене салам калăп.
— Надежда, паянхи кăтартупа кăмăллă-и эсир?
— Çапла. Анчах хам халĕ те çавăн тăршшĕ сикнине ăнланса илме пултараймастăп. Мĕншĕн тесен икĕ çул умлăн-хыçлăн манăн çĕр-шыв чемпионатĕнче ăнмарĕ. Паян вара, акă, сана, 5 метр та 14 сантиметра çити вĕçсе кайма пултартăм. Шупашкар маншăн телей кÿрекен хула пулса тăчĕ.
— Ку кăтартупа тĕнче чемпионатне те выляса илме пулать пулĕ?
— Татса калама йывăр, çавăнпа ун пирки калаçар мар-ха.
— Надежда, Шупашкар, кунти халăх, стадион кăмăла кайрĕç-и сире?
— Хула капăр, таса. Çыннисем кăмăллă, Авă, епле туслăн спортсменсене хавхалантарса тăчĕç. Вĕсемсĕр паян ăнăçу та тăваяс çукчĕ. Стадион та паха, ăмăртма мĕн пур условисем туса панă. Çитĕнÿсем тума ăнтăл кăна.
— Калаçушăн, Надежда, тавтапуç сире, август уйăхĕнче Германире иртекен тĕнче чемпионатĕнче ăнăçлă ăмăртмалла пултăр.
— Тавтапуç, çаплах пултăрччĕ-ха.