25 июня 2009 г.
Çак кунсенче района ырă хыпар çитрĕ: Яманакра çуралса ÿснĕ Людмила Кузьмина, çамрăксем хушшинче çăмăл атлетика енĕпе тупăшса, çĕр-шывра мала тухассишĕн пынă ăмăртура черетлĕ, ку хутĕнче пăхăр медаль çĕнсе илнĕ.
Л. Кузьмина — Раççей спорт мастерĕ, чăрмавсем урлă чупассипе специализациленнĕ. Июнĕн 18-мĕшĕнче вăл Хусанта 20—22 çулсенчи хĕрсемпе тупăшнă, 3000 метрлă дистанцие виççĕмĕш вĕçленĕ. Çĕр-шыв шайĕнчи ăмăртусенче ку унăн пĕрремĕш çитĕнĕвĕ мар. Сăмах май, кăçалхи март уйăхĕнче Саранскра 20—22 çулсенчи хĕрсем хушшинче мала тухассишĕн пынă ăмăртура, çÿлерех асăннă дистанцие 10 минут та 00.11 çеккунтра вĕçлесе, Людмила Кузьмина ылтăн медале тивĕçнĕччĕ. Мĕнех, Трак ен хĕр упраçне спортра çĕнĕ ÿсĕмсем сунатпăр.