17 апреля 2009 г.
Район пуçлăхĕ С. Николаев район территорийĕнче пушар хăрушлăхĕн сезонĕнче пурнăçламалли мероприятисем çинчен 209-мĕш номерлĕ йышăну кăларнă.
Ун тăрăх район территорийĕнче апрелĕн 10-мĕшĕнчен тытăнса вут-кăвара хирĕç кĕрешмелли ятарлă режим, урăхла хушу пуличчен, туса хунă. Ял хуçалăх предприятийĕсен ертÿçисене вут-кăвара хирĕç кĕрешме хатĕр тăма тата техникăна çунтармалли, сĕрмелли материалсемпе тивĕçтерме сĕннĕ.
Вăрман хĕррисемпе 5 метртан кая мар пушартан сыхланмалли тăрăхсем тумалла.
Ял тăрăхĕсен пуçлăхĕсене ялсенче каçсерен дозор тăратассине йĕркелеме, дружинниксенчен ялсенче патруль ĕçне пуçарма, вут-кăвар темипе ăнлантару ĕçне вăйлатма сĕннĕ.
Районти шалти ĕçсен пайĕн начальникне Сурăм лесничествипе пĕрле çынсем йышлă çÿрекен вырăнсенче автомобильсем кĕни-тухнине тĕрĕслесе тăма сĕннĕ.
Асăннă йышăнăва еплерех пурнăçа кĕртнине район администрацийĕн чрезвычайлă лару-тăрупа гражданла оборона ĕçĕсемпе ĕçлекен секторĕн заведующийĕ Н. Васильев тĕрĕслесе тăрать.