13 марта 2009 г.
Красноармейскинчи 2-мĕш вăтам шкулта пуçламăш классем валли спорт уявĕ йĕркелерĕç. “Факел” стадиона пурĕ 90-ăн пухăнчĕç вĕсем, йĕлтĕр йĕрĕ çине 70-шĕ тăчĕ.
Физкультура учителĕ А. В. Васильева хатĕрленĕ программăпа килĕшÿллĕн, вĕренекенсем хăйсен учителĕсемпе пĕрле стадион тавра икĕ çаврăм турĕç. Унтан старта тăваттăмĕшсем тухрĕç. Финиша чи малтан 4 “б” класри Алексей Алексеев çитрĕ. Иккĕмĕш вырăна — Стас Яковлев (4 “а”), виççĕмĕшне Павел Никифоров (4 “б”) йышăнчĕç. Хĕрачасем хушшинчи тупăшура Ольга Тимофеева, Аня Ефимова тата Валерия Терентьева маттур пулчĕç.
2—3-мĕш классенче вĕренекен арçын ачасенчен малти вырăнсене Дима Алексеев, Костя Самойлов, Николай Лаврентьев, хĕрачасенчен Анисса Сорокина, Ксения Николаева, Елизавета Сергеева çĕнсе илчĕç. Çĕнтерÿçĕсене грамотăсемпе чысларĕç. Спорт уявĕ пурне те килĕшрĕ.