13 марта 2009 г.
Февралĕн 21-мĕшĕнче ирхине 8 сехет те 14 минутра районти шалти ĕçсен пайĕн дежурнăй чаçне паллă мар çынсем райпон Еншик Чуллăри магазинне çаратни çинчен хыпар çитнĕ. Милици сотрудникĕсем çийĕнчех вырăна тухса кайнă. Çакна палăртнă: вăрăсем лавккана тул енчи чÿречене илсе, тимĕр решеткене авса шал енчи чÿречене хирсе кĕнĕ. Пĕтĕмпе 830 тенкĕлĕх — шурă эрех, “Бонд” сигарет — тавар илсе тухнă. Çийĕнчех оперативлă шырав мероприятийĕсем ирттернĕ май вăрă йĕрĕ çине ÿкме май килнĕ. Ăна тытса чарнă, уголовлă ĕç пуçарнă.
* * *
Çавăн пекех февралĕн 24-мĕшĕнче ирхине 8 сехетре районти шалти ĕçсен пайне райпон Нимĕчкассинчи магазинĕнчен таварсем вăрласа тухни çинчен хыпар çитнĕ. Оперативлă ушкăн васкавлă Нимĕчкассине тухса кайнă. Вăрăсем лавккана алăксенчи çăрасене ватса кĕни палăрнă. Малтан палăртнă тăрăх, вĕсем 3000 тенкĕлĕх шурă эрех тата апат-çимĕç илсе тухнă.
Вăрăсене тытса чарма май килнĕ, уголовнăй ĕç пуçарнă.