27 февраля 2009 г.
Халăх пултарулăхĕн районти çуртĕнче Тăван çĕр-шыв хÿтĕлевçин кунне халалласа савăнăçлă каç иртрĕ.
Ăна Ольгăпа Айгуля Дуйсембаевасем уçрĕç, вĕсемех ертсе пычĕç. Тăван çĕр-шыв хÿтĕлевçин кунне халалланă каçра Красноармейски ял тăрăхĕн пуçлăхĕ В. Шестаков тухса калаçрĕ, пухăннисене çак уяв ячĕпе ăшшăн саламларĕ, ырлăх-сывлăх, ăнăçу сунчĕ.
— Паян пирĕн ял тăрăхĕнче Аслă Отечественнăй вăрçăн 14 ветеранĕ, 16 воин-интернационалист, Чечен Республикинче çар тивĕçĕсене пурнăçланисем 46-ăн пурăнаççĕ, — терĕ Владимир Константинович. — Халĕ 45 каччă çĕр-шыв умĕнчи таса тивĕçе пурнăçлать, 5-ĕн контракт йĕркипе çĕр-шыв чиккисене сыхлаççĕ.
Куракансене халăх пултарулăхĕн районти çуртĕнче вăй хуракан А. Алексеевпа Г. Яковлев, хĕрсен ушкăнĕ, районти искусство шкулне çÿрекенсем, А. Батракова юрă-ташă парнелерĕç, ĕç ветеранĕ Г. Сергеев çарти кулăшсемпе тыткăна илчĕ. Тăхтавсем вăхăтĕнче “Орифлейм” фирма продукцине рекламăларĕç, телейлисем фирма япалисене тивĕçрĕç.