13 февраля 2009 г.
(Юмореска)
Марьене кăлтлатса тапакан чĕре çумне çупăрласа тытрăм.
— Сансăр пурăнма пултараймастăп, — терĕм ăна.
— Эпĕ те, — пăшăлтатрĕ вăл, ман чĕре патне туртăнса.
Садсем чечеке ларсан, Марьепе мăшăрлантăмăр. Çур çул патне чиперех пурăнтăмăр. Шупашкартан ман варли пулнăскер килсе кайнă хыççăн пирĕн пурнăç кутăн-пуçăн çаврăнса ларчĕ. Хама та, Марьене те тем пулчĕ. Пĕр утиял айĕнче пĕр-пĕрин çумĕнче вут сыпписем пек выртрăмăр. Пĕр кун тата кушакпа йытă пек урайне çыхланса ÿкрĕмĕр. Юрать-ха, ват анне, çын мĕн киле кĕрсен, намăс тесе арăм айĕнчен ураран тытса туртса кăларчĕ.
— Хула эсремечĕ ахальтен килмен. Сан кĕпе çаннипе кинĕн йĕм пĕççине пăсма татса кайнă. Атту... — терĕ вăл.
Арăм тепĕртакран, чăнах та, уйрăлса кайрĕ.
Кĕпе кирекне кĕл çĕклет тенĕрен хайхи варли патне Шупашкара çыру çыртăм. Нумай кĕттермерĕ. “Кил”, — пĕлтерчĕ вăл. Кайрăм. Хваттерĕнче пĕчченехчĕ. Ун çине пăхса тăранаймастăп вĕт. Çывăрма выртас умĕн çăвăнтарчĕ. Таса простынь сарса пачĕ. Ăна чун пек кĕтсе выртрăм.
Выртсан-выртсан, шăнкăрав шăнкăртатрĕ. Ман варли такама уçса кĕртрĕ. Ку арçын пулчĕ. Эп юриех ÿсĕрнĕ пекки турăм. Арçын эп камне ыйтрĕ.
— Кукка ывăлĕ. Ялтан больницăна килнĕ те... — ăнлантарчĕ ăна ман варли.
Арçынпа ман варли кулкаласа калаçрĕç. Рюмкăсем шаклатни илтĕнчĕ. Унтан çутă лап сÿнчĕ. Ман çине тĕттĕм пÿлĕмре тĕлĕнмелле вăрăм каç йăтăнса анчĕ.