19 декабря 2008 г.
Ачасем шăрпăкпа вылясран асăрхаттарсах тăратпăр пулин те, вĕсене пула вут-кăвар час-часах тухать.
Кăçал çеç ачасем шăрпăкпа ашкăннипе Чăваш Енре 58 пушар тухнă, вутра 5 ача вилнĕ, 2 миллиона яхăн тенкĕлĕх пурлăх пĕтнĕ.
Пирĕн районта та кăçал пĕчĕккисене пула 6 пушар тухнă (пĕлтĕр 1 пулнă). Акă, августăн 23-мĕшĕнче Упири пĕр хуçалăхра кил хуçин 2002 тата 2004 çулсенче çуралнă ачисем шăрпăкпа вылянине пула пурăнмалли çурт-йĕрпе хуралтăсем çунса кайнă. Тăкакĕ — 100 пин тенкĕне яхăн.
Августăн 25-мĕшĕнче вара Липовкăра вут-кăвар алхаснă. Кил хуçин 2003 çулта çуралнă ывăлĕ утă купине чĕртсе янă. Вăл тĕпĕ-йĕрĕпех çуннă, хуралтăсем те сиенленнĕ. Тăкак — 500 пин тенкĕлĕх.
Çавăнпах ашшĕ-амăшĕн шăрпăка ачасем илеймен вырăнта упрамалла, вĕсене электроприборсемпе, газ плитисемпе усă курма ирĕк памалла мар. Пĕчĕккисене киле никамсăр хăварма та юрамасть.