16 декабря 2008 г.
Е. Е. Петрова — Кĕçĕн Шетмĕре чи ватти.
Кĕçĕн Шетмĕре манăн асанне пурăнать. Ялта чи ватти вăл. Халĕ — 83 çулта. Елена ЕфимовнаПетрова пулнипе пĕлеççĕ ăна.
Çăмăлах килмен унăн пурнăçĕ. Шкулта çичĕ класс вĕренсе тухнă. Çав вăхăталла вăрçă пуçланнă. Нимĕç эшкерĕ Тăван çĕр-шыв çине тапăнса кĕнĕ. Вăй питти арçынсене фронта ăсатнă. Ялта ватă-вĕтĕ тата хĕрарăмсем кăна тăрса юлнă.
Асаннене те ыттисемпе пĕрле окоп чавма илсе кайнă. Тăван хуçалăхра та пилĕк-çурăма авма тивнĕ. Çурла тытса тырă вырнă.
Вăрçă хыççăн та тĕрлĕрен ĕçсенче вăй хунă. Е.Петрова — сакăр ача амăшĕ. Ялти чи хисеплĕ çынсен йышĕнчен манăн асанне. Ăна юрататăп та, унпа мухтанатăп та.