09 декабря 2008 г.
Анчахрах 75 çул тултарнă Христина Александрова. Тăватă хĕр те икĕ ывăл унăн.
— Йĕпреме çитсе килĕр-ха. Сире эпĕ Христина Алексеевна Александровапа паллаштарасшăн. Уй, çав тери кăмăллă хĕрарăм, — райбольница умĕнче курнăçнă хĕрарăм тăпах чарчĕ мана. — Йăнăшмăр…
Илемлĕ пит-куçлă хăй. Пĕр аллă çулсене çывхарать пулмалла. Йăл кулăпа калаçать.
Ку калаçу иксĕмĕр хушăра вырсарни кун — ноябрĕн 30-мĕшĕнче — пулчĕ. Çырă хĕрарăм автобуса васкать иккен. Тепĕр рейсчен кĕтесшĕнех мар. Ятне-хушаматне пĕлеймерĕм унăнне. Вăл манран уйрăлса райбольница çывăхĕнчи автобус чарăнăвĕ еннелле ярса пусрĕ.
— Эсĕ çав териех васкатăн-им? Пĕрле кайăпăр… — хăлхана хĕрарăм сасси хупларĕ.
Пирĕн çывăхалла хальхи Йĕпремри Христина Александрова çывхарчĕ. Унăн хĕрĕ райбольницăри хирурги уйрăмĕнчи 8-мĕш палатăра выртать-мĕн.
— Сывлăх пултăр сире, Христина Алексеевна. Амăшĕсен кунĕ ячĕпе саламлатăп сире, — алă тытрăм ватăна. — Ан кулянăр-ха, сывалать…
Çамрăках мар ĕнтĕ Х. Александрова. Анчахрах — ноябрĕн 25-мĕшĕнче 75 çул тултарнă. Сăн-питрен çамрăках курăнать. Утти те вăр-вар хальлĕхе.
Хăйĕн кун-çулне Йĕпрем ялĕпе çыхăнтарнă вăл. Ку тăрăхра 1953 çултанпа ĕçленĕ. Тивĕçлĕ канăва тухичченех икĕ алла усса ларман.
— Сурăхсем пăхнă. “Мичуринец” хуçалăхра, сĕт-çу комплексне хута ярсан, дояркăра вăй хутăм. Ĕçлес тесех ĕçленĕ. Ахальтен мар ĕнтĕ мана В. И. Ленин çуралнăранпа 100 çул тултарнă май “Ĕçри хастарлăхшăн”, каярахпа “Ĕç ветеранĕ” медальсемпе чысларĕç. Ку çеç-и тата… Эпĕ ултă ача çуратнă. Вĕсенчен иккĕшĕшĕн те патшалăх медальсемпе наградăларĕ, — чуна уçса калаçрĕ Христина Алексеевна. — Пĕтĕмпе 40 çул ытла ĕçленĕ эпĕ.
Тăватă хĕр те икĕ ывăл унăн. Мăшăрĕ — Александр Александров — пирĕн хушăра çук ĕнтĕ. Вăл 43 çул хуçалăхра водительте тăрăшнă. Ял-йышра хисеплĕ çын пулнă. Мăшăрĕпе ачисемшĕн те чĕререх упранать Александр Александрович.
Район хаçачĕ пирки те калаçса илтĕмĕр. Район хаçачĕсĕр пурăнаймасть иккен Христина Алексеевна. Çырăнать çулленех.