31 октября 2008 г.
Райхаçата вуласан, сывлăх çирĕп пулĕ сан.
Çулсем шав малалла васкаççĕ. Ватăлнăçемĕн вĕсем татах хыпăнтарнине туятăн. Тепĕр чух иртнине аса илетĕп те, те куляннипе, те савăннипе, хаштах сывлатăп. Ку вăхăтлăха кăна-ха тесе хама кăштах лăплантаратăп.
Сакăр вунналла çывхарнă май тата чир-чĕрĕ те ураран ÿкересшĕн çунать. Юрĕ-ха, юнашар район хаçачĕ пур маншăн. Çулленех çырăнса илетĕп район хыпарçине. Уйрăмах сывлăх тематикипе çырнисене пĕр йĕрке те хăвармасăр вулатăп. Акă, анчахрах “Ял пурнăçĕн” 86—87-мĕш номерĕсенче “Халăх медицини” рубрикăпа пылпа алоэ сиплевĕ çинчен усăллă сĕнÿ пулнăччĕ. Вырăнти тухтăрсемпе канашларăм та çак меслетпе усă курни мана та пулăшни куç умĕнчех. Эпĕ те бронхитпа асапланатăп. Асăннă сиплевпе усă курма сĕннĕ мел питĕ усăллă. Халь пĕчĕккĕн-пĕчĕккĕн сывалса пыратăп, вăй-хал та хушăннине туятăп.