28 октября 2008 г.
Нумай хутлă çуртăн хваттерĕсенче пурăнаççĕ иккĕшĕ те. Çамрăках мар ĕнтĕ. Тивĕçлĕ канура. Пĕр-пĕрин патне йăкăр-татасси йăлара ватăсен. Ирпе картлашкапа пĕрле анаççĕ, çÿп-çап тăкма, паллах. Каярахпа лавккасене çаврăнса килеççĕ.
Халĕ те акă, алăк умĕнче курнăçрĕç. Кăмăллă хăйсем. Алтатти çамрăк чухнехилле вăр-вар пускалать. Мархва та, самаях пĕкĕрĕлнĕскер, Алтаттинчен юласшăн мар тейĕн, урисене çăмăллăн хускатать.
— Сывах-и, Мархва?
— Турă пулăшсан…
— Урай сĕрсе тухрăм-ха.
— Чей вĕретрĕм...
— Хăнана чĕнетĕн пуль?
— Епле-ха унсăрăн…
Мархвапа Алтатти чылайччен шăкăлтатса ларчĕç. Сывлăш çулне уçмалли те тупăнчĕ. Пурнăç çăмхи сÿтĕлчĕ. Çамрăклăха аса илчĕç иккĕшĕ. Шел, упăшкаллă пулаймарĕç çав. Иккĕшĕ те пĕр каччăна савнăччĕ.
— Эрхипсĕр пурăнайман эпĕ, — чышкисене чăмăртасах мухтанчĕ кăштах хĕрнĕ Алтатти.
— Ан сÿпĕлтет, мансăр тунсăхлатчĕ вăл. Эсĕ ура хутăн… Тăм писмен, — урисемпе тăрст! тапрĕ Мархва.
Çавăнтанпа ватăсен туслăхĕ пăчланчĕ. Хура кушак чупса иртрĕ пулмалла.