24 октября 2008 г.
Ялти пахчара улмуççисем тавралла çĕр пусатăп. Çулленех кĕркунне ĕçлетĕп çапла. Унччен кил умĕнчи куршанак-вĕлтренсене кĕреçепе касса тухрăм. Тăкăрлăкпа Хветуççи çывхарнине асăрхарăм. Çитмĕл урлă каçнă-ха вăл. Урă чух лăпкă çын. Хаяр шĕвекне урисем çемĕçмелле чăпăртаттарсан… Лăпкăлăх туххăмрах çухалать.
— Хăв кил умĕнчине тасатрăм тетĕн-ха? Ав, анкарти хыçĕнчи куршанаксене кам касать? Манăн пÿрт-çурт умĕнчисене!.. — тарăхсах сурчăк сирпĕтрĕ сарлака хул çурăмлă Хветуççи. — Кам касать?..
— Вăл санăн урам… Вăл санăн кил умĕ, — терĕм ăна. — Эсĕ кас!..
Чăнах та, кăçал çуркуннепе, чун тÿсейменнипе çавапах çулнăччĕ куршанаксемпе вĕлтренсене.
Ÿсĕрпе чĕлхене чараймăн çав. Мĕн каласа ятламарĕ-ши Хветуççи. Урам тасалăхĕ çинчен шутласчĕ.