17 октября 2008 г.
Район хаçачĕ авторсенчен, унта тăтăшах çырса тăракансенчен пуян. Çав йышра ĕнтĕ Туçи Чуракасси ялĕнче çуралнă, халь Çĕрпÿ хулинче пурăнакан Геннадий Павлович Павлов. Вăл 1933 çулхи апрелĕн 25-мĕшĕнче кун çути курнă. Хаçата ялти шкулта вĕреннĕ çулсенче çырма тытăннă. Унăн пĕрремĕш заметки 1948 çулхи февралĕн 5-мĕшĕнче Чурачăк районĕн “Çĕнтерÿшĕн” хаçатĕнче пичетленнĕ. Красноармейски районĕн “Коммунизм çулĕпе” хаçатĕнче пуçласа 1948 çулхи февралĕн 19-мĕшĕнче “Çулпуçсен биографийĕсене юратса вĕренеççĕ”, “Агротехникăна вĕренмелли кружок” материалĕсем çапăннă.
— Манăн район хаçачĕпе çыхăну тытма пуçлани — 60 çул ытла. Çар службинче пулнă çулсенче те (октябрь 1954 — ноябрь 1957ç. ç.) район хыпарçипе туслă çыхăну тытрăм, — тет Геннадий Павлович. — “Ял пурнăçĕ” тус-юлташ вырăнĕнчех.