14 октября 2008 г.
Упирен Пайсупиналла утатпăр. Тăватă çухрăма яхăн. Уçăлмалăх çеç вăл. Манпа юнашарах манăн виçĕ сыпăкри тăван-хурăнташăм Леня пичче пырать. Çитмĕлелле çывхарать хăй. Шупашкарти хваттерĕнче пурăнать. Ялта амăшĕн кил-çурчĕ унăн. Çулла татăлмаççĕ. Мăшăрĕпе килсех çÿреççĕ. Пахчи-анкарти мĕне тăрать. Ĕçлеме çеç ан ÿркен.
Пичче ярса пусмассерен кăмăллăн сăмахлать. Пирĕн хушăри калаçу чăвашлăх пирки сыпăнать.
— Чăваш ятне ярас марччĕ, Юркка шăллăм. Эпир чăн-чăн чăвашсем пулнине хамăр тĕслĕхпе çирĕплетер. Тĕрĕссипе, çаплах тăватпăр та-ха, — тет вăл тарлă çамкине сăмса тутрипе шăлнă май. — Пирĕн атте-аннесем чăн чăвашсемех пулнă вĕт.
Леня пичче амăшĕ пирки те аса илчĕ. Ашшĕ вăрçăра пуç хунăччĕ. Пиччĕшне — Кольă пиччене те — манмарĕ.
— Атте-анне чĕлхине манман вăл. Вырăсла та ÿксе юлман. Мăшăрĕпе — Алисăпа — виçĕ ывăлĕпе икĕ хĕрне ура çине тăратрĕç. Ачисем чăн-чăн чăвашсемех. Çынсемпе вашават кашниех, — мухтанчĕ Леня пичче. — Çавăн пек пулмалла та.