30 сентября 2008 г.
Наркотике, паллă ĕнтĕ, тухтăрсем “шурă вилĕмпе” танлаштараççĕ. Унпа туслашнă çын йывăр лару-тăрăва кĕрсе ÿкет, сывлăхĕ хавшать. Çыннăн вĕренес е ĕçлес пултарулăхĕ чакать.
Акă, кăçалхи çур çулта, тĕрĕслев вăхăтĕнче Чăваш Енре наркотикпе çыхăннă 289 преступление тупса палăртнă.
Чи хăрушши — асăннă чирпе çул çитмен çамрăксем çывăхланни. Ача-пăчана наркотикпе туслашма тĕрлĕрен сăлтав хистет: тус-юлташсен витĕмĕ, хăйсене ирĕклĕ, никама пăхăнман пек тытма хăнăхни, йывăр ыйтусемпе чăрмавсенчен пăрăнма çине тăни.
Тĕрлĕ препаратсемпе усă кураканăн шухăш-туйăмĕ тĕрлĕрен çуралать. Пĕрисем хăйсене çăмăл, çаврăнăçуллă, вăйлă туяççĕ. Теприсем лăпкă, кирек мĕнле йывăрлăх пирки те манаççĕ. Наркотикпе пĕр-икĕ хут усă курсанах çын тĕпсĕр авăр ытамне лекет, ăна психика тĕлĕшĕнчен парăнать. Енчен те çĕнĕ доза пулмасан, наркоман вĕчĕрхенме, тарăхма пуçлать, тимлĕхне çухатать, часах ывăнать. Пĕртен-пĕр шухăш — мĕнле майпа наркотик тупасси? Вăл кĕлеткипе те, ăс-тăнĕпе те — наркотик тыткăнĕнчех. Ăна пула шалти органсем, пĕверпе пÿре уйрăмах чирлеççĕ.
Наркомансем пÿрлĕ чирсемпе, тромбозпа, венăсен шыççипе, гепатитпа чирлеççĕ. Ачасемпе наркотик сиенĕ, вăл сывлăхшăн еплерех сиенлĕ пулни, вĕлерме пултарни пирки час-часах калаçмалла, çав япалана вăйпа сĕнекен çынна хирĕç “çук!” тесе хуравлама вĕрентмелле.