30 сентября 2008 г.
Сентябрĕн 26-мĕшĕнче пшонкăсен “иккĕмĕш çăкăр” пуссинче халăх кăткă пекех хĕвĕшетчĕ. Еншик Чуллă вăтам шкулĕн вĕренекенĕсемпе вĕрентекенĕсем ĕçлеççĕ-мĕн кунта.
— Тăваттăмĕш кун ĕнтĕ çакăнта çĕр улми пуçтаратпăр, — тет пиллĕкмĕшсен класс ертÿçи Светлана Викторовна Монарева. — 5—11-мĕш классенче вĕренекенсем. Ĕнер 40 йăран çинчине пухрăмăр. Паян эпир килнĕ çĕре тата 64 кăларса хунă, пуçтар кăна…
Çĕр улмийĕ шап-шурах выртать. “Нива” хуçалăхăн тĕп агрономĕ О. Козлова пĕлтернĕ тăрăх, “иккĕмĕш çăкăрăн” гектарти вăтам тухăçĕ — 190 центнера яхăн. Копалкăсене Юрий Козловпа Юрий Дмитриев механизаторсем ĕçлеттереççĕ-мĕн. Ольга Васильевна еншикчуллăсен ĕçĕпе кăмăллă.
Çĕр улми пуссинче ачасен сасси тăрать, шÿтле-шÿтле, кула-кула ĕçлеççĕ вĕсем, пĕр-пĕринпе ăмăртмаллах пуçтараççĕ. Куç умĕнчех “иккĕмĕш çăкăр” тултарнă михĕсемпе сеткăсен хисепĕ ÿссе пырать. Ретĕн-ретĕнех ларса юлаççĕ вĕсем.
— Ĕнер шкул рекордне лартрăмăр, 33 тонна çĕр улми пухса ăсатрăмăр. Малтанхи кунсенче ку кăтарту 23—25 тоннăпа çеç танлашнăччĕ. Пуçтаракансем 70-ĕн. Вĕсене 6 класс ертÿçи пулăшать. Грузчикĕсем те хамăрăнах, вĕсем — 10-ăн. Çак йышшăн 33 тонна сахал мар... — тет шкулти класс тулашĕнчи ĕçсене йĕркелесе пыракан Владимир Абрикосов.
Çапла, çĕр улми пуссинче ирхи 8 сехетрен пуçласа 16 сехетчен ачасем ăмăртсах ĕçлеççĕ, “Нива” хуçалăха пулăшу кÿреççĕ, хăйсем валли вĕри апат пĕçерме продукци хатĕрлеççĕ тата ытти те.