26 сентября 2008 г.
Пĕчĕк ача пулнă çав ун чух. Астумаллине астунă та пуль. Çавах та куккине — апайпа пĕр тăванĕн ывăлне авлантарнине манаймастăп-ха. Мана та, пĕчĕкскере, килте пăрахса хăварман, хĕр çураçма пĕрле илнĕ.
Кукки Ухванеç ятлăччĕ. Ялта пĕртен-пĕр ят Хура Ухванеç… Те çав териех, сăн-питрен хура тĕслĕ пулнăран-ши, Хура Ухванеç тетчĕç кашниех. Пирĕн апай апла каламастчĕ-ха. “Уй-уй! Çынсенчен намăс кăтартас мар шăллăма. Уй-уй! Ухванеçĕн авланмалла вĕт”, — тетчĕ.
Кукки вăтăр урлă каçнăччĕ, хĕрĕхелле çывхаратчĕ. Улах-вăйăсене тухса çÿренине астумастăп. Чун-чĕререн юратнă, куç хывнă хĕрĕ те пулман ялта.
— Ял хĕсĕр мар-çке. Атя, Пюçки Хĕлимунĕн Сухвине çураçатпăр. Ухванеç хирĕçлемĕ… — апайпа мăнакай пăшăлтатрĕç пĕррехинче. — Акка хирĕç пулмĕ.
Ухванеçĕн ашшĕ вăрçăран таврăнмарĕ. Эпĕ ăна Çемен мучей тесе чĕннĕ пулăттăм.
Пюçки те вăрçă хирĕнчех выртса юлчĕ. Сухви те ашшĕсĕр çитĕнчĕ. Амăшĕ, Акруç ятлăскер, вашават, ĕçчен хĕрарăмччĕ.
— Акруç тăхлачăм, каçарăр та, кĕçĕрех илсе кайăпăр хĕре, — кăштах хĕрнĕ хĕрарăма тепĕр черкке сĕнчĕ мăнакай. — Каччипе хĕрĕ çураçуллах пирĕн.
— Ухванеç, Сухви пек хĕр ялта пĕрре вĕт. Тата сан пек каччă та ялта пĕрре… — сĕтел хушшинче çумма-çуммăн ларакан çамрăксенчен куçĕсене илмерĕ апай. — Çураçрăмăр та илсех каятпăр.
Туй сасси те пулмарĕ ун чух. Те çураçма çеç кайнăран-ши? Каялла икĕ урапапа таврăнтăмăр. Кукки авланни, çĕнĕ çын кил-çуртра хуçаланни мана та пĕчĕкскере питĕ савăнтарчĕ.