23 сентября 2008 г.
Пире “Хыпар” хаçатăн 163-мĕш номерĕнче пичетленнĕ “Мăнастир çĕнелет” статья шухăша ячĕ. Вулар-ха: “...Улатăр районĕнчи Междуречьере чиркÿ туса пĕтереççĕ. Ăна çак ялти тата кÿршĕ ялсенчи турра ĕненекенсен вăйĕпе тăваççĕ. Çак вырăнта таса çăл куç тупнă, ăна тĕпрен тасатаççĕ. Кувакино тата Суйкăн ялĕсенче те чиркÿсем пулаççĕ. Шăмăршă районĕнчи Çĕнĕ Чукалта та чиркÿ тăваççĕ. Кÿкеçре тăвакан чиркÿ стенисене илемлетме йышăннă. Шупашкар районĕнчех 15 метр çÿллĕш часавай çĕкленет...”
Карай ялĕнче те икĕ хутлă йывăç чиркÿ (ăна 1911-мĕш çулта уçнă) хăй вăхăтĕнче илемлĕн курăнса ларнă, кашни çын кунта килмессерен хăйне çĕнĕрен çуралнă пек туйнă, чĕререн тухакан кĕлĕ яланах илтĕннĕ.
Халь ку чиркÿ çук. Ун тавра тахçан лартнă тирексем çеç кунта чиркÿ пулни çинчен аса илтереççĕ.
Карай ялĕнче чиркÿ тумасан та, часавай лартма пулмасть-ши? Ырă ĕçсен çулталăкĕнче мĕн теççĕ-ши кун пирки, карайсем?