02 сентября 2008 г.
Çурла уйăхĕн 21—25-мĕшĕсенче Рязань хули çуллахи полиатлон енĕпе Раççей чемпионатне хутшăннисене йышăннă. Пирĕн республика чысне унта Красноармейски, Вăрнар тата Çĕмĕрле районĕсен спортсменĕсем хÿтĕленĕ. Сывлăх сыхлавĕн “Красноармейски тĕп больници” муниципаллă учрежденийĕн врачĕ Владислав Перепелкин, 40—45 çулсенчи ветерансем хушшинче ăмăртса, Раççей чемпионĕ пулса тăнă. Владислав Иванович медальпе пĕрле пневматика винтовкинчен персе тата 60 метра чупса лайăх кăтартусемпе палăрнăшăн грамотăсене тивĕçнĕ.
Чăваш Республикинчи ветерансен команди (унта В. Перепелкинсăр пуçне С. Политов (Вăрнар поселокĕ), Д. Шипеев (Çĕмĕрле) тата пирĕн ентеш, Мускавра пурăнакан С. Зубарев кĕнĕ) 14 командăран виççĕмĕш вырăн çĕнсе илнĕ. Сăмах май, С. Зубарев Тăван çĕр-шывăн Аслă вăрçине хутшăннă, кăçал 85 çул тултарать.