15 августа 2008 г.
Тинех çанталăк çĕр ĕçченне кăшт хĕрхенес терĕ пулас. Тăватă кун ĕнтĕ хĕртсе хĕвел пăхать. Çавна май районта вырма ĕçĕсен хăвăртлăхĕ ÿсрĕ.
Августăн 12-мĕшĕнче “ВОСТОК” хуçалăхăн ыраш пуссинче икĕ комбайн ĕçлетчĕ. Пĕрне, сарăрах тĕслине — Вячеслав Федоров, теприне, симĕссине, ăна анчахрах туяннă, Геннадий Дмитриев тытса пырать.
— Çак лаптăка вырса çапсан, 140 гектар пулать, — тет Владимир Иванов инженер. — Çуртрисем — тулăпа урпа пирĕн начар мар. Урпа пулса кайнă, унта куçатпăр...
“ГИГАНТ” ЯХПКан 1-мĕш бригадинче 6 комбайнпа çурхи тулă выратчĕç. “Уй-хир карапĕсем” пĕр тикĕс ĕçлеççĕ.
— Ĕнер каçхи 9 сехетчен вырчĕç. Эпĕ 33 бункер тырă йышăнтăм, — пĕлтерет ГАЗ-53 автомашинăпа тырă турттаракан Александр Григорьев водитель.
6 комбайнран пĕри — “Енисей-1200” маркăлли — тин çеç илсе килнĕскер. Вăл августăн 12-мĕшĕнче кăнтăрла иртсен çеç пĕрремĕш каçалăка тăчĕ. Ăна хуçалăхри ăста та пултаруллă В. Николаев механизатор ĕçлеттерет. Владимир Валерьянович ун ĕçĕпе кăмăллă.
Сăмах май, алманчсем “Енисей-1200” комбайнсăр пуçне тепĕр 2 çĕнĕ МТЗ-82.1 трактор хăваласа килнĕ. Апла-тăк ĕç тухăçлăхĕ ÿсмелле.
“ТАЯБИНКĂРА” уйран килекен тыр-пула тасатса тирпейлесех пыраççĕ. Красноармейскипе Çавалçырмара та КЗСсем йĕркеллĕ ĕçлеççĕ. Йĕтем çинче çамрăксен пĕр ушкăнĕ хĕрсех пăрçа аллатчĕ. Петр Тимофеев практикант-машинист, Çĕрпÿри аграрипе технологи техникумĕн пĕрремĕш курсне пĕтернĕскер, сортировкăна пĕр тикĕс ĕçлеттерет.
— Ĕнер Федор Яковлев каçхи 11 сехетченех вырчĕ. 58,8 тонна тырă çапса илчĕ, — пĕлтерет Çавалçырмари П. Константинов кладовщик. — Тулăн гектарти вăтам тухăçĕ 30 центнер ытла.
Ку пĕрлешÿ тырă вырнипе пĕрлех çĕртме сухи çĕклеме кÿлĕннĕ. Владислав Владимировпа Владимир Кузнецов Т-150К тракторсемпе сухалаççĕ.
— Пĕр кун çурăра 40 гектар сухаларăмăр пулмалла, — пĕлтерет В. Владимиров тракторист.
“КОЛОС” пĕрлешÿн Малти Карăкри йĕтемĕ çинче те ĕç вĕресе тăрать. Йĕтем çинче 14-ăн, вĕсенчен иккĕшĕ çулланнисем, ыттисем шкул ачисем вăй хураççĕ. Эпир пынă чух кунта ыраш вăрлăхлăх “Петкус-Гигант” витĕр кăларатчĕç. Владимир Яковлев сортировкăсене лайăх пăхса тăрать.
— Ыраш вăрлăхĕ пире 60 тонна кирлĕ. Эпир 100 тонна ытла хатĕрлерĕмĕр те ĕнтĕ, — ĕç-пуçпа паллаштарать Николай Фомин управляющи. — Кĕрхисем 240 гектар йышăнмалла. Çав шутра тулă — 30 гектар, ытти ыраш пулмалла. Хатĕр çĕрĕ ытлашшипех пур. Вăхăтра акса хăварас тетпĕр...
Çĕр ĕçченĕн паян ларса канма вăхăт çук: тыррине те вырмалла, кĕр аки те ирттермелле, кĕç çĕр улми кăларма тухмалла. Çавăнпа вăл халь канăçсăр ĕçре, уяр кунăн кашни сехечĕпе туллин усă курас тесе тăрăшать.