Публикации » Ватăсене — кĕпе-тумтир

12 августа 2008 г.

Чăваш Ен Президенчĕ Н. В. Федоров 2008 çула Ырă ĕçсен çулталăкĕ тесе пĕлтернине сывлăх сыхлавĕн “Красноармейски тĕп больници” муниципаллă учрежденийĕнче вăй хуракансем те хапăлласа йышăнчĕç. Кунта çак енĕпе мероприятисен планне туса çирĕплетрĕç. Унпа килĕшÿллĕн, сывлăх хуралçисем тĕрлĕ ĕçсем ирттереççĕ. Вĕсенчен пĕри — нуша куракан çемьесемпе ватă çынсем валли килте усă курнă, çапах та тăхăнма юрăхлă кĕпе-тумтир пухасси. Чылайăшĕ ку акцие хастаррăн хутшăнчĕ. Çурла уйăхĕн 4-мĕшĕнче вара пухнă кĕпе-тумтирĕн пĕр пайне, çавăн пекех хăйсем пĕçерсе кăларнă пысăк кукăльсене райбольницăра ĕçлекенсем Чатукассинчи ватăсен çуртĕнче пурăнакансене леçсе пачĕç. Çавăншăн вĕсене хисеплĕ ветерансемпе пĕрлех С. Н. Матвеев заведующи те ăшшăн тав турĕ.