01 августа 2008 г.
И. Дмитриев уйрăм предпринимателĕн çĕвĕ цехĕ ăнăçлă ĕçлесе пырать. Кунта тĕпрен илсен Ульяновскри автозавод заказĕсене пурнăçлаççĕ, 15 —20 тĕрлĕ продукци хатĕрлеççĕ. Хăйĕн хастарĕсемпе ку коллектив чăннипех мăнаçланма пултарать. Акă илер Л. Васильева çĕвĕçех. Людмила Николаевна уйăхсерен плансене ирттерсе тултарса пырать. “Предприяти ветеранĕ”, теççĕ ун пирки кунта вăй хуракансем. Чăннипех çапла иккен.
—1988 çулхи августăн 3-мĕшренпе, çĕвĕ цехĕ йĕркелеме пуçланă кунранпах, çакăнта ĕçлетĕп, — пĕлтерет Людмила Васильева. — Ун чух УАЗ çăмăл автомашинăсем валли тентсем, сасăна пĕчĕклетме май паракан хатĕрсем çĕлеттĕмĕр. Паян вара вĕсен хисепĕ вуннăран та иртсе кайрĕ...