01 августа 2008 г.
Вулакана эпĕ пĕр минутлăха каллех Васнара илсе çитерес тетĕп. Мĕншĕнне тÿрех калатăп: сăмах кушак çинчен пырĕ. Мисуркин ятлăччĕ вăл пирĕн. Эпир ÿстермен-ха ăна. Юнашар пурăнакан Аркадий (аттен шăллĕ) пиччесем патĕнче çитĕннĕ. Хăйне май питĕ ăслă чĕр чун. Тĕп килте кăшт ятласан, пирĕн пата тарса пырать. Тепĕр чух эрнипех пурăнатчĕ. Эпир сивĕ сăмах каласан, тĕп киле шăвăнать. Çапах та ытларах пире кăмăллатчĕ вăл. Апайпа час-часах ирсерен ĕне вĕренлеме каятчĕ те кунĕпех вĕрен шалчи патĕнче выртатчĕ. Каçхине каллех пĕрле килетчĕ, "ĕçшĕн" сĕт парасса кĕтсе ларатчĕ. Кÿрентермен эпир Мисуркина, ăна та кăна та çитернĕ. Апат хыççăн ура çумне пырса сĕртĕнетчĕ те кайса çухалатчĕ.
Кахал ухутник пулман вăл, шăши-йĕке хÿре таврашне алхасма паман. Пурăнма пĕлнех çав мăр-мăр, икĕ хуçана та юранă вĕт.