11 июля 2008 г.
Васнар ялĕ Шетмĕ урамĕпе пуçланать. Асфальтлă çул тап-такăр. Ун тăрăх çăмăллăн яра-яра пусатăн. Çулăн икĕ енĕпе вырнаçнă çурт-йĕрсене сăнатăн. Курнăçнă кашни самант куç умĕнчех.
Хăшĕ-пĕринпе паллаштарам-ха. Эпĕ ял чиккине кĕтĕм кăна, мана çĕлĕкне çамки çине пусарах лартнă арçын алă тытрĕ. Фуфайкăпа хăй. Сăн-питрен ватах мар, аллă çулсене çывхарать пулмалла.
— Здрави желаю! Ку тăрăхалла хыпăнтарас-и? — сулмаклă аллине тăсрĕ вĕл. — Хур чĕпписене пăхатăп-ха.
Чăнах та, çул хĕрринчи лупамра пĕр ушкăн чĕп кĕшĕлтетет. Ăмăртмаллах курăка турткалаççĕ. Самаях пысăкланнă-ха хăйсем.
— Чип-чипер çитĕнтерсен кĕркунне хур тукмакки туртатăр ĕнтĕ, — сăмах хушрăм арçынна.
— Тукмакки тукмак та-ха. Тăватă ураллисем халех шăл айне хума пуçларĕç, — тарăхнине пытараймарĕ сарлака хул-çурăмлăскер.
Сăмах кунта йытăсем пирки пырать иккен. Кăткăсем евĕрех ĕрчесе кайнă ялта. Хуçасăрскерсем хăйсене ирĕклĕн туяççĕ, çынсене сăтăр тăваççĕ.
— Манăнне те, ав, пĕр-икĕ кун хушшинче çичĕ хур чĕппине йăкăртса кайрĕç. Тьфу! — чышкисене чăмăртарĕ арçын.
Вăл тăруках шухăша путрĕ. Кулянать, паллах. Çирĕм хур чĕппишĕн 3 пин тенкĕ кăларса хур-ха. Тата вĕсене пĕрерĕн-пĕрерĕн çухатсан... Укçа пулă хуппи мар вĕт...
— Хуçасăр йытăсене чармаллах... Унсăрăн ай-вай... Пулĕ-ши вăл усси... Хур тукмакки туртасси... — сăвăлла юптарчĕ çак сăмахсене арçын. — Пулĕ-ши вăл усси....