11 июля 2008 г.
Çĕртме уйăхĕн 29-мĕшĕнче Чаканар ялĕнче пурăнакан Валентина Гурьевнапа Павел Михайлович Михайловсем пĕрлешсе çемье чăмăртанăранпа 60 çул çитнине паллă турĕç. Павел Михайлович Тăван çĕр-шывăн Аслă вăрçине хутшăннă, Валентина Гурьевна вара тылра хура тар юхтарнă. Каярахпа иккĕшĕ те тăван колхозра вăй хунă. Юратупа килĕшÿре вĕсем 5 ача çитĕнтернĕ. Халĕ 16 мăнукĕпе вĕсен 8 ачи Михайловсене куç тулли телей-илем кÿреççĕ.
Бриллиант туй ячĕпе вĕсене çак кунсенче районти ЗАГС пайĕн заведующийĕ Е. Павлова ăшшăн саламланă, район администрацийĕн Тав çырăвне панă. Телейлĕ мăшăра çавăн пекех Красноармейски ял тăрăхĕн специалисчĕ В. Петров, тăванĕсем ырă сывлăх, вăрăм кун-çул суннă.