01 июля 2008 г.
Ял халăхĕшĕн хĕрÿ тапхăр пуçланчĕ: пахча çимĕçе çум курăкран тасатмалла, утă-улăм пуçтарса кĕртмелле. Çак вăхăтра вара вут-кăвар алхасас хăрушлăх та пысăк. Инкекрен хăтăлас тесен, унран асăрханмалли йĕркене çирĕп пăхăнмалла: утă-улăмпа ĕçленĕ чухне чĕлĕм туртмалла мар, хуçалăхра утă-улăм куписене кил-çурт çывăхĕнчен 50 метртан çывăхрах, пысăк вольтлă пралуксенчен — 15, çулсенчен 20 метртан çывăхра лартмалла мар.
Ял хуçалăх предприятийĕсенче обществăлла выльăх-чĕрлĕх валли тĕрлĕрен апат хатĕрленĕ чухне, çавăн пекех тыр-пула массăллăн пухса кĕртнĕ тапхăрта та пушарсем сиксе тухаççĕ.
Пушарсем тухнин тĕп сăлтавĕсем çаксем: утта активлă вентиляци меслечĕпе типĕтнĕ чух пушар хăрушсăрлăхĕн правилисене пăсни, вут-кăварпа асăрханусăр, ял хуçалăх техники юсавсăр пулни. Енчен те инкек сиксе тухрĕ пулсан — мĕн чухлĕ пурлăх тата çурт-йĕр пĕтет. Çакна асра тытăр: пушар инкекĕсенчен хÿтĕленмелли чи лайăх меслет вăл — пушар правилисене пур çĕрте те тата яланах тĕрĕс пăхăнни.