08:55 28 января 2015 г.
А. Данилов, Пикшик ял тăрăхĕн пуçлăхĕ:
Пирĕн ял тăрăхĕнче пурăнакансем Чăваш Ен Пуçлăхĕ М. В. Игнатьев Патшалăх Канашне янă "Пĕрле эпир нумай çитĕнỹ тăватпăр!" Çырăва хапăлласа йышăнчĕç. Вĕсем унăн пĕлтерĕшĕ пысăккине палăртаççĕ. Михаил Васильевич хăй каланине конкретлă цифрăсемпе, фактсемпе туллин çирĕплетсе пыни мана та килĕшрĕ. Çавăнпах тата кăçалхи Çыру ыттисенчен уйрăлса тăни те уççăнах сисĕнчĕ. Чăн та, паян лару-тăру пĕртте ансат мар. Йывăрлăхсем пур çĕрте те тенĕ пекех кĕтсе тăраççĕ. Михаил Васильевич вĕсене çĕнмелли майсене тỹррĕн каларĕ, ку чухне алă усма юраманнине палăртрĕ. Вăл пĕрремĕш вырăнта çын пулмаллине тепĕр хут асăнни те питĕ вырăнлă тесе шутлатăп. Пурте унпа çыхăннă-çке. Акă, иртнĕ çул вĕçĕнче Ямайкасси ялĕнче модульлĕ çĕнĕ фельдшерпа акушер пункчĕ уçăлчĕ. Тахçантанпах кĕтнĕччĕ ăна пирĕн тăрăхри халăх. Çак пĕр тĕслĕх те республика ертỹçи çынсем пирки шухăшланине кăтартса парать. Чăваш Ен Пуçлăхĕ ял хуçалăх ыйтăвĕсене тĕрĕс те уççăн çĕклени те савăнтарать. Ют çĕршывсен санкцийĕсем, калăпăр, пирĕн хресченсене шанăç çеç кỹреççĕ — ав, ял хуçалăх продукцийĕн сутлăх хакĕсем тинех ỹсме тытăнчĕç. Хам спортпа туслăран М. В. Игнатьев физкультурăпа спорта аталантарас енĕпе палăртса каланисем чуна çĕклеççĕ. Аслă Çĕнтерỹ тунăранпа 70 çул çывхарнă май, ветерансен тĕслĕхĕ çинче çамрăк ăрăва патриотла воспитани парассине лайăхлатас, сывă пурнăç йĕркине çирĕплетес тĕлĕшпе пĕлтернисем те мана çывăх.
АУ "Редакция Красноармейской районной газеты "Сельская жизнь"