20 мая 2008 г.
Шупашкарта хăвăрт утас енĕпе иртнĕ XXIII Тĕнче кубокĕнче спортсменсем 5 ушкăнра тупăшрĕç. Унта хĕрарăмсем 20 километра утрĕç. Асăннă дистанцире 39 çĕр-шыври 99 хĕрарăм вăй виçрĕ. Вĕсен хушшинче пирĕн районти Дубовка ялĕнче çуралса ÿснĕ тĕнче класлă спорт мастерĕ Людмила Архипова 4-мĕш вырăн йышăнма пултарчĕ. Вăл Раççей командипе (Ольга Каниськинапа Татьяна Сибилевапа пĕрле, кунта команда членĕсен чи лайăх 3 вăхăтне илеççĕ — автор) Тĕнче кубокне тата ылтăн медале çĕнсе илчĕ. Пирĕн корреспондент Людмила Клементьевнапа чыслав хыççăн, вăхăт тупса, калаçнă.
— Люда, çитĕнÿпе саламлатăп. Кăмăлăрсем еплерех-ши?
— Тавтапуç. Ăмăрту кăтартăвĕпе эпĕ кăмăллă. Малтан тренерсемпе палăртнă пекех пулчĕ. Чăн та, кăçал хам кăтартнă чи лайăх вăхăта пĕр минут патне выляса ятăм. Питĕ ывăнтăм. Пĕрремĕш çаврăмра икĕ енчен хĕскĕчпе хĕссе лартнă пек хĕссе лартрĕç, урасене таптаса пĕтерчĕç, аран-аран хĕсĕнсе тухса пĕтрĕм вĕт...
— Виççĕмĕш вырăна тухма май пурччĕ пулĕ. Португали спортсменне кăшт çеç хуса çитеймерĕн. Маттур, аван утрăн эсĕ.
— Çитес тенĕччĕ, анчах вăй юлмарĕ. Хамăр командăри тепĕр икĕ хĕрпе пĕрле утса пыма килĕшнĕччĕ, анчах вĕсенчен пĕрне судьясем хĕрлĕ карточкăсем парса тултарчĕç, тепри виççĕмĕш карточка иличчен маларах тупăшуран тухрĕ. Мĕн тăвăн.
— Малашнехи тĕллевсем мĕнлерех-ши, Люда. Тĕнче кубокĕнче ылтăн медале тивĕçрĕн, Олимп вăййисене хутшăнас кăмăл çук-и?
— Июнĕн 5—6-мĕшĕсенче Саранскра Раççейĕн çуллахи чемпионатне хутшăнмалла. Олимпиадăна лекме унта хамăрăннисем хушшинче хытах тапаçланма лекет. Конкуренци питĕ пысăк.
—Халех спорта хăварас теместĕн пулĕ те?..
— Халех мар, тепĕр хушă ăмăртас шухăш пур-ха.
— “Ял пурнăçĕ” хаçат вулаканĕсене мĕн калас тетĕн тата?
— Чи малтанах, вĕсене Шупашкарта иртнĕ XXIII Тĕнче кубокне килсе пире тăвăллăн хавхалантарса пынишĕн тавтапуç, иккĕмĕшĕнчен, вĕсене ĕçре, вĕренÿре ăнăçусем тума ырлăх-сывлăх сунатăп.
— Калаçушăн тавтапуç Сире, Люда, çĕр-шывăн черетлĕ çуллахи чемпионатĕнче ăнăçу сунатăп. Унччен пĕр хушă канса илсе тренировкăсене тухăçлă ирттерме вăй-халсем çитсе пыччăр, Людмила.