18 марта 2021 г.
Пуш уйăхĕн 8-мĕшĕ — çуркуннехи пĕрремĕш уяв. Вăл — чи ырри, савăнăçли, аннесен, асаннесемпе кукамайсен пит-куçне савăк кулăпа çутатать, хĕр-упраç кăмăл-туйăмне çутă ĕмĕтсемпе çунатлантарать.
Кĕçĕн Шетмĕри вулавăшра «Канашçă» клуб членĕсем валли «Çуркуннепе ăшăннă çак кун мĕн пур чечек, савăнăç — сире» ятлă юрă-кĕвĕллĕ, вăйăллă кану каçĕ йĕркеленĕ. Общество ĕçĕн хастарĕсене Кĕçĕн Шетмĕ ял тăрăхĕн пуçлăхĕ Галина Ефимова та саламларĕ.
Тĕрлĕ конкурс, вăйă, шÿт, юрă-ташă уява тата та пуянлатрĕç. Хĕрарăмсем «Пĕтĕмпех хĕрарăм ячĕпе çыхăннă» викторинăра, «Хĕрарăм çинчен каланă ваттисен сăмахĕсем», «Чечек çыххи», «Ăнлан мана», «Хĕрарăм-асамçă» конкурссене хутшăнчĕç, парнеллĕ пулчĕç. Юлашкинчен пурте пĕрле сиплĕ чейпе, тутлă кукăльпе, тортпа сăйланчĕç.
Вулавăшра уяв тĕлне «Çуркунне, чечекпе юрату уявĕ» кĕнекесен куравне те йĕркеленĕ. Кĕçĕн Шетмĕри кану центрĕнче вара «Хĕрарăм — çуркуннехи тĕлĕнтермĕш чечек çыххи» ятлă конкурс-кану каçĕ иртнĕ.
Валентина ИЛЬИНА.