27 октября 2020 г.
Ача чухнех Ирина амăшĕпе, Клавдия Захаровăпа, Шупуçĕнчи лавккана тăхăнмалли, çимелли, хуçалăхра кирлĕ пулакан ытти таварсене туянма каймассерен сутăç ĕçне кăмăлланă, çак професси çыннин ĕçĕ çине пăхса тăма килĕштернĕ. Çитĕнсе пынă май хĕрĕн сутуçă ĕçне суйласа илес ĕмĕт татах та çуталса çирĕпленсе пынă. Пикшик вăтам шкулĕнчен алла аттестат илсе тухсан Ирина Шупашкарти бухгалтерсем хатĕрлекен курса кайса кĕнĕ, ăна ăнăçлă вĕренсе пĕтерсе алла диплом илнĕ. Хамăр районти райпона ĕçе вырнаçнă. Çамрăк специалиста Пикшикри лавккана сутуçă ĕçне сĕнеççĕ. 1996 çултанпа çав ĕçре тимлет Ирина, шанса панă ĕçе чунтан юратать. Вăхăчĕ питĕ хăвăрт шăвать, кĕçех, авă, унтанпа чĕрĕк ĕмĕр çитет. Хальхи вăхăтра И. Степанова Н. Ивановăпа пĕрле ял халăхне, килен-каяна апат-çимĕç, куллен кирлĕ таварсемпе тивĕçтерме тăрăшаççĕ, умри тĕллевсене пурнăçласа пыраççĕ. Тавар туянакансем вĕсен ĕçĕпе кăмăллă, сутуçăсене тав туса хăвараççĕ. Ирина ачаран ĕçпе пиçĕхнĕ. Çуллахи каникул кунĕсенче вăл Шупуçĕнчи сĕт-çу ферминче тăрăшакан ашшĕ-амăшне пулăшма çỹренĕ, кĕтỹ кĕтнĕ, ĕне сунă. Иванпа Клавдия Захаровсем тивĕçлĕ канăва тухич-ченех “Большевик” ху-çалăхăн Шупуç ферминче тимленĕ. Ашшĕпе амăшне хисеплесе Ирина “амăшĕн юратăвĕ тинĕсрен тарăн, ашшĕн юратăвĕ сăрт-туран çỹллĕ” тесе калама юратать. Вĕсем мăшăрĕпе, Валерий Степановпа, икĕ ача пăхса çитĕнтереççĕ, вĕсене пурнăçăн анлă çулĕ çине кăларма хатĕрлеççĕ. Асли, Анатолий, хĕсмете кайиччен илнĕ специальноçпе тăрăшать, кĕçĕнни — студент. Пикшик ялĕнче хăтлă пỹрт-çурт çĕклесе лартнă Степановсем, картиш тулли выльăх-чĕрлĕх, кайăк-кĕшĕк тытаççĕ. Пỹрт-çурт çавăрма пулăшнă амăшне тав туса çапла калать Ирина: “Ĕçсе те курнă, çисе те курнă, тем тĕрлĕ апат-çимĕç тутаннă пулĕ, анчах анне пĕçернĕ çăкăрпа кукăль-çимĕç мĕн ачаран чĕрере, нихăçан та манăçа ан тухтăр. Пуринчен те тутлăраххи, пылакраххи вăл аннен апачĕ-çимĕçĕ...”.
Л. Соловьев.