23 октября 2020 г.
Ионикия Борисова (1924-1989) _ РСФСР тата ЧАССР тава тивĕçлĕ врачĕ, сывлăх сыхлавĕн отличникĕ. Вăл Элĕк районĕнчи Тури Выла ялĕнче çуралнă, Хусанти медицина институчĕн санитарипе гигиена факультетĕнче вĕреннĕ. Алла диплом илсен çамрăк специалиста Советски (каярахпа _ Етĕрне) районĕнчи санитарипе эпидемиологи станцине ĕçлеме янă. Унтан Ионикия Владимировнăна тăван района куçарнă: санэпидемстанци ертỹçи, районти сывлăх сыхлавĕн пайĕн пуçлăхĕ пулнă. 1956 çулта ăна район больницин тĕп тухтăрне çирĕплетнĕ. Çак должноçра вăл 27 çул тăрăшнă. Ионикия Борисова участок больницисем уçас, инфекциллĕ тата йăла чирĕсемпе кĕрешес, ача-пăча вилеслĕхне чакарас тĕлĕшпе нумай вăй хунă. Ертỹçĕ медучрежденин пурлăхпа техника никĕсне вăйлатас енĕпе те чылай ĕçленĕ, амбулаторипе поликлиника çурчĕсем хута янă. Пенси çулĕсем çитсен те вăл ĕçрен пăрăнман, терапи уйрăмĕн пуçлăхĕн тивĕçĕсене пурнăçланă. Пултаруллă тухтăра ЧАССР Аслă Канашĕн Президиумĕн Хисеп хучĕпе икĕ хутчен чысланă, унăн ятне Элĕк районĕн Ĕç Мухтавĕн Хисеп кĕнекине кĕртнĕ. Пилĕк çул каялла Ионикия Владимировна çуралнă çурт çине Асăну хăми çакнă.