14 августа 2020 г.
Иртнĕ кунсенче тăлăх салтак арăмĕ, тыл ветеранĕ, вăрçă ачи, Яманакра пурăнакан Мария Антонова 90 çулхи юбилейне паллă турĕ. Çав кун Мария Михайловна ячĕпе чылай ăшă сăмахсем янăрарĕç. Хисеплĕ ватăна çак паллă кун ячĕпе Кĕçĕн Шетмĕ ял тăрăхĕн пуçлăхĕ Г. Ефимова ятарласа саламлама килнĕ. Галина Ефимовна ăна Раççей Президенчĕ В. Путин алă пуснă саламлă çыру тата хаклă парне пачĕ. Хăнасем М. Антоновăна çирĕп сывлăх, канлĕ ватлăх, çывăх çыннисен тимлĕхне тата юратăвне сунчĕç. Мария Михайловна 1930 çулхи утă уйăхĕнче хресчен çемйинче кун çути курнă. Хаяр вăрçă çулĕсенче йывăрлăха тỹссе ирттернĕ. Каярах вăл фронтовика качча тухнă. Мăшăрĕпе тăватă хĕрпе икĕ ывăл çитĕнтернĕ. Пысăк çемьере туслăх хуçаланнă. Паян ачисем Мария Михайловна пĕçернĕ ыраш çăкăрне ăшшăн аса илеççĕ. М. Антонова паян пĕчченех пурăнать. Анчах ачисем, кинĕсемпе кĕрỹшĕсем ватăна пăрахмаççĕ. Вăл хăйĕн 13 мăнукĕпе, 16 кĕçĕн мăнукĕпе туллин савăнать.
С. Самсонов.