16 июня 2020 г.
Çу кунĕсем малалла пыраççĕ. Кĕçех кун таврăнать. Ял çынни вара кулленхи ĕçсене малалла пурнăçлать: утă çулать, çĕр улми кăпкалатать, йăрансене çум курăкран тасатать... Анчах çав вăхăтрах республикăри хуласенче те, районсенче те коронавирус инфекцийĕпе чирлекенсен йышĕ, шел те, чакмасть-ха. Çĕртме уйăхĕн 15-мĕшĕ тĕлне Чăваш Енре коронавируспа 4033 çын чирленĕ. Ку амака парăнтарнисен хисепĕ 2197 çынпа танлашнă. Ку çĕнĕ вируса пула республикăра 18 çын вилнĕ. Раççейре 528975 çынна ернĕ коронавирус. 280140 çын сывалнă. 6980 пациент вилнĕ. Коронавирус çав-çавах “тапăнма” пăрахмасть-ха. Анчах нумай чухне çынсем сыхă, асăрхануллă, яваплă пулмаллине асра тытасшăн мар. Çав вăхăтрах чирленĕ çынсем ыттисем, ĕçтешĕсем çинчен ытлашши шухăшласшăн мар. Акă, Хĕрлĕ Чутай районĕнче вырăнти влаçрисем коронавирус инфекциллĕ çынсем йĕркене епле пăхăннине çителĕксĕр тĕрĕсленине палăртнă ЧР Правительствин вице-премьерĕ А. Салаева. Иртнĕ кунсенче Алла Леонидовна ку тăрăхра пулнă. Вăл палăртнă тăрăх, Хĕрлĕ Чутай районĕнче кашни эрнере сахалтан та 200 çыннăн килти изоляцире пулмалла. “Çав çынсене тĕрĕслесех тăмалла. Ку ĕçе полици ĕçченĕсен пурнăçламалла”, — тенĕ А. Салаева. Аса илтеретпĕр: Хĕрлĕ Чутай районĕнче 72 çемьере коронавирус сарăлнă. Хутшăнăва кĕнисен хисепĕ 202 çын. Вĕсенчен 46-шĕ — ачасем. ЧР Министрсен Кабинечĕ йышăннă тăрăх, малашне ЧР Сывлăх сыхлавĕн министерствинче ĕçлекенсем килти изоляцие пăсакансен тĕлĕшпе РФ КоАПĕн 20.6.1 статйипе килĕшỹллĕн протокол çырма тытăнаççĕ. Шупашкарта “Çурçĕр” клиникăн пĕр корпусĕнче çак кунсенче коронавируспа чирлисене сиплеме тепĕр 150 койка хатĕрлеме палăртнă. Хальлĕхе Чăваш Енре пурĕ 1547 койка. Çакна та палăртмалла: паян чылай çын коронавирус чирĕ пуррине ĕненмест. Ку вара — питĕ япăх. Ĕненменнипе чылайăшĕ пур çĕрте те маскăсăр çỹрет, алăсене антисептик сапмасть. Çакă чире хăвăртрах сарăлма витĕм кỹрет те. Регионти Правительство подъездсене, ача-пăча лапамĕсене, çулсене, общество транспорчĕ чарăнакан вырăнсене санитари енчен тасатма хушма укçа-тенкĕ уйăрма пăхать. Маларах общество вырăнĕсене дезинфекци тума Етĕрне районне 500 пин тенкĕ уйăрнă. Сăмах май, паян коронавируспа чирлессипе районсем хушшинче Етĕрнесем малта. Шăмăршă районĕ — иккĕмĕш вырăнта. Хĕрлĕ Чутайсем — виççĕмĕш. Хамăра хамăрăн сыхламаллах пирĕн. Пирĕн сывлăх хамăрсăр пуçне никама та кирлĕ мар. Çавăнпа маскăпа çỹремелле, алăсене хуçалăх супăнĕпе тăтăш çумалла. Каçсерен сăмса шăтăкĕсене те супăньпе çуни вырăнлă. Май пур таран çынсемпе ытлашши хутшăнма тăрăшмалла мар. Общество транспорчĕпе сахалрах усă курмалла. Температура ỹссен тỹрех тухтăра киле чĕнсе илмелле.