14:22 18 августа 2020 г.
Пирĕн обществăра хĕрарăмăн пĕлтерĕшĕ калама çук пысăк. Çакă район администрацийĕн пĕчĕк залĕнче йĕркеленĕ "Çавра сĕтел" хушшинчи калаçура яр уççăн палăрчĕ. Унта Чăваш Енри хĕрарăмсен Канашĕн Красноармейскинчи уйрăмĕн кăçалхи пĕрремĕш çур çулти ĕç-хĕлĕн кăтартăвĕсене тишкерчĕç. Çавра сĕтел хушшинчи уçă калаçăва хĕрарăмсен вырăнти уйрăмĕсен ертỹçисем, районти уйрăмăн канаш членĕсем, хĕрăрăм-активистсем хутшăнчĕç. Пухăннисем умĕнче район администрацийĕн пуçлăхĕ А. Кузнецов тухса калаçрĕ, ку таранччен туса ирттернĕ ĕç-хĕлпе, умри тĕллевсемпе паллаштарчĕ. "Çавра сĕтел" хушшинчи калаçăва пухăннисем "Чăваш Енри хĕрарăмсен Канашĕ" республикăри обществăлла организацин председателĕ Н. Николаева тухса каланине питех те ăшшăн йышăнчĕç. Наталья Алексеевна хăйсем туса ирттерекен ĕç-хĕл çинчен каласа кăтартрĕ. "2021 çула Чăваш Енре Сăр тата Хусан оборона чиккисене тăвакансен ĕç паттăрлăхне халлалланă çулталăк тесе пĕлтернĕ. Ку енĕпе пирĕн Канаш та пысăк ĕç тума палăртать. Эпир унта хутшăннă хĕрарăмсен сăн ỹкерчĕкĕсене, асаилĕвĕсене пуçтарма пуçлатпăр, каярах ăна халалланă пĕр-пĕр энциклопеди кăларма палăртатпăр. Çавăнпа Трак тăрăхĕнчен те материалсем кĕтетпĕр, _ терĕ Шупашкар хăни._ Пĕлỹ кунĕ çывхарать. Пирĕн Канаш пĕрремĕш урока "Мир тата патриотизм урокĕ" тесе палăртасшăн. Унта хутшăнма пултаруллă хĕрарăмсене йыхравлатпăр. Умри тĕллевсем татах та пысăк. Пĕр пулсан эпир вĕсене пурнăçлатпăрах". Чăваш Енри хĕрарăмсен Канашĕн Красноармейскинчи уйрăмĕн председателĕ Р. Николаева кăçалхи çур çулхи ĕç кăтартăвĕсем çинчен каласа кăтартрĕ, вун-вун цифра илсе пачĕ. Шупашкар хăни Трак енĕн паллă вырăнĕсене çитсе курчĕ, вĕрентỹ пайĕн диагностикăпа консультацин, çăкăр завочĕн, ДЮСШн, "Колосок" ача сачĕн, Красноармейскинчи ачасен искусство шкулĕн ĕçĕ-хĕлĕпе паллашрĕ. Ю. Борисов.
АУ "Редакция Красноармейской районной газеты "Сельская жизнь"