20 мая 2021 г.
Çу уйăхĕн 4-20-мĕшĕсенче Трак енре Чăваш Республикин Сывлăх сыхлавĕн министерствин онкологи диспансерĕн ренгент лабораторийĕ ĕçлерĕ.
Çав кунсенче çирĕплетнĕ ятарлă графикпа ялсенче пурăнакан хĕрарăмсем маммографи тухма – хальхи вăхăтра хĕрарăмсен анлăн сарăлса пыракан сĕт парĕсен ракне тĕрĕслеттерме – пултарчĕç.
Пушă вăхăтпа усă курса Марина Гаврилова ренгентлаборантпа сăмах пуçартăм.
— Асăннă профессипе саккăрмĕш çул вăй хуратăп. Кăшăл вирусĕ алхаснине пула пĕлтĕр кун евĕрлĕ тĕрĕслевсене ирттереймерĕмĕр, — палăртать Марина Павловна. — Кăçал, авă, хĕлĕпех республика территорийĕ тăрăх çÿретпĕр. Çу уйăхĕн пысăк пайне Трак енре ирттертĕмĕр. Пирĕн тĕллев — кунне 40 çынран кая мар йышăнасси. Мĕн палăртнине пурнăçласа пыратпăр. Хам енчен çакна çеç калам: чире малтан тупнинчен лайăххи нимĕн те çук.
ЧР Сывлăх сыхлав министерствин Васкавлă медицина пулăшăвĕн больницин «Красноармейски районĕн тĕп больници» филиалĕн территорийĕнче ĕçлекен лабораторие хыççăн-хыççăн çын килет. Çав кун Пикшик ял тăрăхĕнчи ялсенче пурăнакансем ытларахчĕ.
Татьяна БОРИСОВА,
общество корреспонденчĕ.